ဖိုဒန်ရဲ့ မှော်ဝင် ဟက်ထရစ် ခြေစွမ်းနဲ့ အတူ စီးတီးတို့ ဗီလာကို အီတီဟက်မှာ ဘယ်လို ဂိုးပြတ် အနိုင်ယူသွားခဲ့သလဲ
မနေ့ညက မန်စီးတီး အသင်း အီတီဟတ်မှာ အက်စတန် ဗီလာကို ဧည့်ခံ ကစားခဲ့ရာ ၄-၁ နဲ့ အပြတ် အသတ် အနိုင်ရခဲ့ပါတယ်။
ဒီပွဲမှာ ဖီးလ် ဖိုဒန်က တစ်ဦးတည်း ၃ ဂိုး ဟက်ထရစ် သွင်းယူနိုင်ခဲ့ပြီး မန်ချက်စတာစီးတီးတို့ဟာ ပရီးမီးယားလိဂ် ဖလားပြိုင်ဘက်တွေဖြစ်တဲ့ အဆာင်နယ်နဲ့ လီဗာပူးလ်တို့ကို ဖိအားဆက်လက်ပေးနိုင်ခဲ့ပါတယ်။
မန်စီးတီးနည်းပြ ဂွါဒီယိုလာက တနင်္ဂနွေနေ့က အာဆင်နယ်နဲ့ ဂိုးမရှိသရေကျခဲ့တဲ့ပွဲအပြီး အဓိကစားသမားတွေဖြစ်တဲ့ ဟာလန်းနဲ့ ဒီဘရိုင်းနားတို့ကို အနားပေးခဲ့ပေမယ့်လည်း လက်ရှိ ချန်ပီယံတွေဟာ ဧည့်သည်ဗီလာတို့အတွက် အလွန်အားကောင်းနေသေးတာဖြစ်ပါတယ်။
အက်စတန် ဗီလာဟာ ဒဏ်ရာပြဿနာအများအပြားနဲ့ ရင်ဆိုင်ခဲ့ရသလို ပွဲမတိုင်ခင်မှာလည်း အဓိကပွဲထွက်ဂိုးသမား အီမီလီယာနို မာတီနက်ဇ် နာမကျန်းဖြစ်ခဲ့တာကြောင့် လူစာရင်းထဲကနေ ချန်လှပ်ခဲ့ရတာဖြစ်ပါတယ်။
ဖိုဒန်က ဒီရာသီ ၂၁ ဂိုးအထိ ရောက်ရှိစေမယ့် ဟက်ထရစ်သွင်းဂိုးကို သွင်းယူနိုင်ခဲ့ပြီး ပထမပိုင်း ၁၁ မိနစ်မှာ ဒိုကုရဲ့ ဖြတ်တင်ပေးပို့မှုအပြီး ရိုဒရီက မန်ချက်စတာစီးတီးအတွက် အဖွင့်ဂိုးကို သွင်းယူပေးခဲ့တာဖြစ်ပါတယ်။
အက်စတန် ဗီလာဟာ နောက်ထပ် ၉ မိနစ်အကြာမှာ ဂျွန် ဒူရန်က မော်ဂန် ရော်ဂျာစ်နဲ့ သေသပ်တဲ့ အပေးအယူပြုလုပ်ခဲ့ပြီးနောက် အနိမ့်ဘောကန်ချက်နဲ့ အော်တေဂါကို အလဲထိုးပြီး ချေပဂိုး ပြန်လည်ရရှိသွားခဲ့တာဖြစ်ပါတယ်။
အဲဒီနောက်ပိုင်းမှာတော့ မန်ချက်စတာစီးတီးအတွက် သွင်းဂိုးတွေကို ဖိုဒန်က တာဝန်ယူခဲ့တာဖြစ်ပြီး ပထမပိုင်း ပြီးဆုံးခါနီးမှာ ကိုက် ၂၀ အကွာက အလွတ်တည်ကန်ဘောကနေ တိုက်ရိုက် ကန်သွင်းယူသွားခဲ့တာ ဖြစ်ပါတယ်။
ဒုတိယပိုင်း ၆၂ မိနစ်မှာ ဖိုဒန်က နောက်ထပ် ဦးဆောင်ဂိုးကို ထပ်မံသွင်းယူပေးခဲ့ပြီး ရိုဒရီရဲ့ အလွန်ကောင်းမွန်တဲ့ ပေးပို့မှုကနေ အနိမ့်ဘော ကန်သွင်းယူသွားခဲ့တာဖြစ်ပါတယ်။
နောက်ထပ် ၇ မိနစ်အကြာမှာ ဖိုဒန်က ဟက်ထရစ် ပြည့်မြောက်စေမယ့် ဦးဆောင်ဂိုးကို သွင်းယူခဲ့တာဖြစ်ပြီး အစပိုင်းမှာ ဘောလုံးပိုင်ဆိုင်မှု ဆုံးရှုံးခဲ့ပေမယ့်လည်း ပြန်ရအောင် ယူနိုင်ခဲ့ပြီးနောက် ဂိုးညာဘက်ထောင့်ထဲကို ပင်နယ်တီဧရိယာအစွန်ကနေ ဒုံးပျံတစ်စင်းပစ်လွှတ်လိုက်သလို ကန်သွင်းယူသွားခဲ့တာဖြစ်ပါတယ်။
မန်စီးတီးဟာ နာကျင်အချိန်ပိုမှာ ဆာဂျီယို ဂိုးမက်ဇ်ရဲ့ ဘယ်ခြေကန်ချက်နဲ့ ကန်သွင်းယူမှုကြောင့် နောက်ထပ် ဦးဆောင်ဂိုး ရလုနီးပါးဖြစ်ခဲ့သေးပြီး ဒီနိုင်ပွဲကြောင့် မန်စီးတီးဟာ တစ်ပွဲလျော့နေတဲ့ လီဗာပူးလ်နဲ့ ရမှတ်တူ အဆင့် ၃ နေရာမှာ ဆက်လက်ရပ်တည်ပြီး ဆုဖလားပြိုင်ဘက်တွေကို ဖိအားဆက်ပေးနိုင်ခဲ့ပါတယ်။