အိုင်ဒီယာအဆန်းနဲ့ မြို့ခံပြိုင်ဘက် မန်ချက်စတာ ယူနိုက်တက်ကို စီးတီး ပရိသတ်တွေ လှောင်ပြောင်
မန်ချက်စတာစီးတီး ပရိသတ်တွေဟာ ဘရိုက်တန်အသင်းကို ၃-၀ နဲ့ အနိုင်ရရှိခဲ့တဲ့ ဗုဒ္ဓဟူးနေ့ညနေ ပွဲစဉ်မတိုင်ခင် အီတီဟတ်ကွင်းအပြင်ဘက်က ချီးပုံပေါ်မှာ စာတင်ပြီး မန်ချက်စတာ ယူနိုက်တက်ကို လှောင်ပြောင်ခဲ့ကြပါတယ်။
မန်ချက်စတာယူနိုက်တက်အသင်းဟာ အင်္ဂါနေ့ညက အန်းဖီးမှာ လီဗာပူးလ်ကို ၄-၀ နဲ့ အရှက်တကွဲ ရှုံးနိမ့်ခဲ့တာဖြစ်ပြီး မန်စီးတီးဟာ ဗုဒ္ဓဟူးနေ့ညမှာ ဘရိုက်တန်ကို ၃-၀ နဲ့ အနိုင်ရရှိခဲ့ပြီးနောက် ပရီးမီးယားလိဂ်အမှတ်ပေးဇယားထိပ်ဆုံးကို ပြန်လည်တက်လှမ်းနိုင်ခဲ့တာဖြစ်ပါတယ်။
မန်ချက်စတာစီးတီးဟာ ဒုတိယပိုင်းက မာရက်ဇ်၊ ဖီးလ် ဖိုဒန်၊ ဘာနာဒို ဆေးလ်ဗားတို့ရဲ့ သွင်းဂိုးတွေကြောင့် အရေးကြီးတဲ့နိုင်ပွဲ ရရှိခဲ့ပြီး အမှတ်ပေးဇယား ဒုတိယနေရာက လီဗာပူးလ်အသင်းထက် ၁ မှတ်အသာနဲ့ ရပ်တည်နိုင်ခဲ့ပြီဖြစ်ပါတယ်။
မန်ချက်စတာယူနိုက်တက်အသင်းကတော့ လီဗာပူးလ်နဲ့ပွဲအပြီး အဆင့် ၆ နေရာအထိ ကျဆင်းသွားခဲ့တာကြောင့် စနေနေ့ အာဆင်နယ်နဲ့ ကစားရမယ့်ပွဲစဉ်မှာသာ အနိုင်မရခဲ့ဘူးဆိုရင်တော့ ထိပ်ဆုံး ၄ နေရာ မျှော်လင့်ချက် ပြီးဆုံးသွားမှာဖြစ်ပါတယ်။
မန်ချက်စတာစီးတီးအသင်းပရိသတ်တွေဟာ ဘရိုက်တန်ကို အနိုင်ရရှိခဲ့တဲ့ပွဲစဉ်မတိုင်ခင် မန်ချက်စတာ ယူနိုက်တက်ကို သူမတူတဲ့ပုံစံနဲ့ လှောင်ပြောင်ခဲ့ကြပါတယ်။
အီတီဟတ်ကွင်းအပြင်ဘက်က မြင်းချေးပုံတွေပေါ်မှာ အမည်မသိပရိသတ်တစ်ဦးက “တကယ်လို့ ဒီချေးပုံကို တွေ့ရှိခဲ့တယ် ဆိုရင် အိုးထရက်ဖို့ဒ်ကို ပြန်ပို့ပေးလိုက်ပါ”ဆိုတဲ့စာကို ရေးသားပြီး တင်ထားခဲ့တာဖြစ်ပါတယ်။
အဲဒီစာရဲ့အောက်မှာ ဖုန်းနံပါတ်လို နံပါတ်တွေလည်း ပါဝင်နေပြီး “အိုးထရက်ဖို့ဒ် အိမ်သာလိုင်း ၀၁-၆၁-၆၁-၆၁-၆၁ ကို ဖုန်းခေါ်လိုက်ပါ”လို့ ရေးသားထားပုံအရ မန်ချက်စတာစီးတီးအသင်း ပရီးမီးယားလိဂ်ဖလား ရရှိခဲ့တဲ့ ၂၀၁၁-၂၀၁၂ ရာသီအတွင်း မန်ချက်စတာယူနိုက်တက်ကို ၆-၁ နဲ့ အနိုင်ရခဲ့တဲ့ ကျော်ကြားတဲ့နိုင်ပွဲကို ရည်ရွယ်ပြီး ရေးသားခဲ့တယ်လို့ ယူဆရပါတယ်။