ပရီးမီးယားလိဂ်ဖလားအတွက် မန်စီးတီးရဲ့ အဓိက ပြိုင်ဘက်အသင်းကို ရိုဒရီ ပြောပြလာ
ဒီရာသီ ပရီးမီးယားလိဂ် ဆုဖလားကို ကလပ် ၅ သင်းလောက်က အပြိုင်ဖြစ်နေကြပြီး မန်စီးတီးဟာ ခက်ခဲတဲ့ ဘောလုံးရာသီ တစ်ခုကို ကျော်ဖြတ်နေရပါတယ်။
မန်စီးတီး ပါဝင်နေတဲ့ ပရီးမီးယားလိဂ် ပြိုင်ဆိုင်မှုအကြောင်း မေးခံရချိန်မှာ ကွင်းလယ်လူ ရိုဒရီက ပြိုင်ဘက်ဟောင်း လီဗာပူးကို သတိကြီးထားနေပေမယ့် အသင်းတိုင်းကို လေးစားစွာဖြင့် မှတ်ချက်ပေးခဲ့ပါတယ်။
ရိုဒရီက “ ခင်ဗျားလာမေးတာကို ဖြေပေးရရင် ကျနော်တို့ရဲ့ တကယ့် ပြိုင်ဘက်စစ်စစ်က လီဗာပူးပေါ့။ ဘာလို့လဲဆိုတော့ အရင်နှစ်တွေတုန်းက သူတို့အသင်း ဆုဖလား အောင်မြင်မှု အတွေ့အကြုံတွေ ရှိထားပြီးပါပြီ။
မနှစ်တုန်းက အာဆင်နယ်က အဲ့လို အဆင့်ကို ရောက်နိုင်ကြောင်း ပြသခဲ့တယ်။ ဒီရာသီမှာ သူတို့က မနှစ်တုန်းက မရှိထားတဲ့ အတွေ့အကြုံတွေ ရှိလာနေပါပြီ။
ဗီလာကလည်း ဘယ်လောက် အင်အားကြီးနေသလဲနဲ့ သူတို့ စိတ်ပြင်းပြမှုတွေ၊ ရည်မှန်းချက်တွေ ဘယ်လောက် ကောင်းလဲ မြင်ကြတာပဲလေ။ ပထမဆုံးအကြိမ် ဖလားစိန်ခေါ်ရတာက မလွယ်ပါဘူး ဒါပေမယ့် ဘာဖြစ်လာမယ်ဆိုတာ ဘယ်သူကကော သိမှာလဲ။
စပါးက ပုံစံကောင်းတွေ ကစားနေပါတယ်။ အသင်းတွေ အများကြီးအကြောင်း အကောင်းမြင်စရာတွေ ပြောလို့ရပါတယ်။ ဒါပေမယ့် ဘယ်အသင်း ဖလားအောင်မြင်ဖို့ ရေပန်းစားလဲဆိုရင်တော့ ကျနော် ရွေးချယ်မှာ မန်စီးတီးပဲပေါ့ ” လို့ ပြောဆိုခဲ့တာပါ။
စီးတီးဟာ အမှတ်ပေးဇယား ဒုတိယနေရာမှာရှိနေကာ ဇယားထိပ်က လီဗာပူးနဲ့ ၂ မှတ်ပဲ ကွာဟနေတာ ဖြစ်ပါတယ်။